وان ذمني ذم الردي ما طرحني..

[يبطون ماوصلوا مواصيل قدري]

أنا كثير الهرج ما اشيل همه
اما انعثر دوني لغيري شقحني
لو اسمعه مالد بالعين يمه
أنا أعرف الرمّاح لو ما رمحني
عندي خبر ما كل كلمه مهمه
ولا كل هراجٍ بهرجه جرحني
بعض البشر ما احسب لمدحه وذمه
لو ذمني بالهرج والاّ مدحني
ما زادني مدح الردي خابت أمه
وان ذمني ذم الردي ما طرحني
بعض البشر عايش على غير يمه
ماني بمقترحه ولا مقترحني
دمه ثقيل ومعجبه ثقل دمه
لو يقدحونه قال ما احدٍ قدحني
كسبه مع الشجعان نقّال نمه
طول الدهر عنقه عن الطيب محني
وسط المجالس كل علمٍ يخمه
ومن النفاق مطبقٍ كل لحني
اصغي عنه بالعين والسمع أصمه
واليا غلط مسموح لو ما سمحني
أنا رفيق اللي يعز ابن عمه
اللي ليا جا لازمي ما كسحني
اليا عطيته علم علمي يضمه
واليا استحقيت النصيحه نصحني
واليا افترق راي الجماعه يلمه
ما قال سعيٍ في رضاهم ذبحني
حرٍ مواقيعه على راس قمه
اما اربحه بالطيب والا ربحني
امشرّفٍ ربعه وخاله وعمه
اليا حصل ما بين الأخصام شحني
هذا كلامٍ كل شخصٍ يعمه
واما هرجت الصدق عِرفي سفحني
وبأزكا صلاه ابدا كلامي واتمه
ولا كل هراجٍ بهرجه جرحني

[اصيل عبس]

ابيات راقية وجزلة
كل الشكر والتقدير لك