منتديات الكفة لقبائل بنى رشيد

يالله عسى الخفجي تعله سحابه
سودا تعله لين تملا خباريه

الله بلانــي فــــي محــبة ترابه
وانا من أول يعلم الله ما دانيه

عيد بن مربح
🌹🌹🌹🌹

يا عيد ابن مربح ياعل السحابه
لامرت الخفجي وسالت خباريه
تآصل ديار اللي خفوقي عثابه
غروٍ سكن قلبي وشيّد مبانيه
وسط الجبيل اللي عشقنا ترابه
بأسباب منهو يابن مربح سكن فيه

عبدالرحمن الشمري
🌹🌹🌹🌹🌹
عساه من لابه يفيض اللابه

يبدا من العثمور واللي حواليه

ينشي على دار الكرم والمهابه

تركد هواه وينهمر كل مافيه

وبعدين للخفجي ديار القرابه

وجنوب منه اليالجبيل وضواحيه

محمد عمران الرشيدي
🌹🌹🌹🌹🌹
ابداع شعري كل برقٍ سرابه
هذا مبارله وهذا مجاريه

احساس شاعر هاجسه ماشرابه
مهيضه برق ٍ يلوح وكتب فيه

عبدالرحمن بن علوش
🌹🌹🌹🌹
وعقبه تشوف العشب وسط الشعابه. .
في خايعن عيني تحلى حراويه. .
يفرحبه الصقار لاجى جنابه. ..
لافرع القرناس والصيد ناويه. .
مع ربعتن بين الصديق وقرابه. .
هذا ولد عمه وهذا بناخيه. .

الشاعر .. مساعد نور .. الوافي.
🌹🌹🌹🌹🌹
ويمطرعلى دارالنبي والصحابه
والصلصله وثنان يسقي ضواحيه

ويعل حسو. التين دارالذيابه.
دارعسى الباري يبارك لراعيه

ثم روض بن هادي ويسقي هضابه
الروض روض جداد ماني بناسيه

واثقب وسكانه ديار الشيابه
دار المحامي عز منهو محاميه

الدكتور مساعد ناصر الزبون
🌹🌹🌹
ويمر دار اهل الكرم والمهابه
أبن الزبون اللي اكبارن هقاويه

يعلها الهتان ضافن سحابه
على المبرز لين تخضر مفاليه

وتهب له من شرق لين يغدابه
والياستو من حول الابيض يباريه

ياخذ يسار اشوي حمل ارتكابه
وعلى قرى ألملوي يبني مبانيه

خاتم حاضر المهيمزي

🌹🌹🌹🌹🌹
وتقفي به صلف الهبوب الهابه
وتفرق المزن عقب تساويه

ويزين ممشى الارض لكل دابه
عقب المطر والسيل اللي غدا فيه

سعد حميد القلادي
🌹🌹🌹🌹

يالله عسى دعواتكم مستجابه
من الذي كون سحابه وينشيه

رب كريم ولاخسرمن لجابه
أهو الكريم إللي علينا حسانيه

محمد مزيد بن هرسان
🌹🌹🌹🌹